Yeniyetmə qız uşaqları təbii olaraq qorxur və ginekoloji müayinədən imtina edirlər.

Profilaktik ginekoloji müayinələrin əhəmiyyəti

Hər bir qadın profilaktika məqsədilə ildə ən azı 1-2 dəfə ginekoloq müayinəsindən keçməlidir. Bu, yalnız mövcud şikayətlərin yoxlanılması üçün deyil, həm də gizli gedən xəstəliklərin vaxtında aşkarlanması üçün vacibdir.

Niyə hər bir qadın profilaktik müayinədən keçməlidir?

Birinci ginekoloji müayinə 14–16 yaşlı qız uşaqlarında, ailə həyatı qurmadan aparılır. Yeniyetmə qızlar çox vaxt qorxduqları üçün ginekoloji müayinədən imtina edirlər. Lakin onlara izah olunmalıdır ki, bu yaşda daxili ginekoloji müayinə aparılmır. Yalnız xarici müayinə, USM (ultrasəs müayinəsi) və laborator analizlər həyata keçirilir. Bu müayinələr sayəsində cinsi yetişkənliyin dərəcəsi, anadangəlmə qüsurlar və digər problemlər vaxtında aşkar edilir.

Profilaktik müayinələrin onkologiyada rolu

Profilaktik ginekoloji müayinələr, xüsusən onkoloji xəstəliklərin erkən aşkarlanmasında mühüm rol oynayır. Qadınlarda ən çox rast gəlinən onkoloji xəstəliklər arasında süd vəzi xərçəngi və uşaqlıq boynu xərçəngi xüsusi yer tutur. Bu xəstəliklər ilk mərhələdə heç bir əlamət vermir. Simptomlar yalnız gec mərhələdə ortaya çıxır və bu zaman müalicə daha çətinləşir. Ona görə də vaxtında müayinə – həyat qurtarır.

Uşaqlıq boynu patologiyaları və risk faktorları

Uşaqlıq boynu xərçənginin qarşısını almaqda fon və xərçəngönü vəziyyətlərin aşkarlanması əsasdır. Bunlara endoservisit, həqiqi eroziya, leykoplakia və displaziya daxildir. Bu vəziyyətlər vaxtında aşkarlanarsa, xərçəngin qarşısı alınmış olur. Ginekoloji müayinələr zamanı çox vaxt cinsi yolla keçən infeksiyalar da aşkar edilir. Bunlara insan papillomavirusu (HPV), ureaplazma, mikoplazma və xlamidiya daxildir. Bunların arasında ən təhlükəlisi HPV-dir, çünki o, uşaqlıq boynu xərçənginin əsas səbəbi hesab olunur.

Pap-Test və onun əhəmiyyəti

Uşaqlıq boynu xərçəngini erkən aşkar etmək üçün ildə bir dəfə Pap-test edilməlidir. Bu test zamanı uşaqlıq boynundan yaxma götürülür. Prosedur sadə, ağrısız olmaqla yanaşı, böyük diaqnostik əhəmiyyətə malikdir. Əgər yaxmada patoloji hüceyrələr aşkarlanarsa, əlavə diaqnostik müayinələrlə xəstəliyin mərhələsi dəqiqləşdirilir.

Sonsuzluğun qarşısının alınması

Cinsi yolla keçən infeksiyaların erkən aşkarlanması və müalicəsi son dərəcə vacibdir. Əks halda onlar xroniki iltihab, fallop borularında zədələnmə və nəticədə sonsuzluq kimi ciddi problemlərə gətirib çıxara bilər. Müntəzəm ginekoloji müayinələr hər bir qadının sağlamlığını qorumaqla yanaşı, həm də həyatını xilas edə bilər. Erkən diaqnostika – uğurlu müalicənin açarıdır.